E pazakontë në Dropull, i moshuari zbulon tunelin poshtë shtëpisë: E hapi komshiu që kërkonte thesare (VIDEO)

Çuditë në Shqipëri nuk kanë të ndalur! Një banor i fshatit Terihat në Gjirokastër, hapi një tunel 30 metra të gjatë, me qëllim për të shkuar te banesa e vëllait. Por, gaboi rrugën dhe doli poshtë dritares së komshiut.

Në redaksinë e “Fiks Fare” u ankua një banor i të njëjtit fshat, i cili pretendonte se, në momentin që kishte hipur në një shkallë, me qëllim për të rregulluar çatinë e shtëpisë, toka është çarë dhe ka rënë në një gropë të madhe. Z.Mantho pohon se nga rrëzimi është dëmtuar, ndërsa kur ka rënë në gropë ka vënë re se brenda kopshtit të tij, ishte ndërtuar një tunel i gjatë 30 metra.

“Tuneli më ka prishur një pjesë të themeleve të shtëpisë. U futa brenda në tunel dhe pashë se ishte ndërtuar mirë. Anës kishte mure mbajtëse, ndërsa në tavan i ishin vendosur pllaka guri. Tuneli kishte edhe elektrifikim. Unë ndoqa gjurmën, dhe më çoi te shtëpia e komshiut”, thotë i moshuari, ndërsa tregon se thirri edhe komshiun, për t’i treguar çfarë i kishte ndodhur.

“Erdhi e pa tunelin dhe në fillim më tha se e kishte si hambar, do të mbante djathin, rakinë. Më pas më tha se tunelin e kishte bërë për t’u lidhur me shtëpinë e të vëllait, e cila është sipër shtëpisë sime. Nuk e besova, pasi mendoj se e ka hapur për të gjetur ndonjë thesar. Shtëpia ime më parë ka qenë bazë e grekëve në luftën me italianet. Babai i komshiut ma ka kërkuar disa herë për ta blerë. Ai kishte informacione se në nëntokë fshihej thesar. I kërkova të më jepte dhe mua ndonjë pjesë, po s’më dha asnjë gjë”, tregon z. Mantho, ndërsa pohon se rastin e ka denoncuar edhe në polici.

Pas denoncimit, gazetarët e Fiksit u futën brenda në tunel për ta parë. Tuneli ishte i gjatë 30 metra dhe ngjasonte me galeritë e minierave. Brenda tij kishte mjete pune, kapele mbrojtëse si dhe vegla të ndryshme. Madje, disa pjesë, ishin ndërtuar edhe me mur guri, me qëllim që tuneli të mos shembej. Dhëndëri i denoncuesit thotë se arsyeja e vetme përse është hapur tuneli, është për thesar. Sipas tij, tuneli është hapur për vite me radhë.

Gazetarët e Fiksit shkuan edhe në banesën e personit që ndërtoi tunelin. Në bisedë, ai pohon se fillimisht, në vendin ku është ndërtuar tuneli, ka qenë zgavër.

“Më tha babai që të gërmoj më tutje. Fillimisht mendova ta bëja një vend kur të lija djathin, rakinë. Më pas, në kohën e vitit 1997, babai më kërkoi që të bëja një tunel në nëntokë, për t’u lidhur me banesën e vëllait, pasi kishim frikë nga vjedhjet” thotë ai

Pyetjes se përse përfundoi te komshiu, ai thotë se ka qenë një gabim, pasi gjatë gërmimeve, i ka dalë parë një shkëmb i madh.

Deklaratën e komshiut se ka kërkuar për thesare, ai e quan si budallallëk, ndërsa thotë se punimet e fundit janë bërë para 4 vitesh. Në fund, heq përgjegjësinë nga vetja, duke pohuar se ka qenë ideja e babait të tij për të ndërtuar tunelin, ndërsa nuk ka pasur qëllim që të gjejë thesare në tokën e komshiut.