5 vjet nga 21 Janari, përkujtohet në Gjirokastër Ziver Veizi. Në ceremoni s’ka përfaqësues të LSI-së

Ziver Veizi, një prej protestuesve të vrarë në protestën e 21 Janarit përballë Kryeministrisë është përkujtuar sot edhe në Gjirokastër. Familjarë të tij, si dhe drejtues lokalë të institucioneve, morën pjesë në homazhet që u mbajtën në varrezat e fshatit Zenelaj.

Në ceremoni mungonte kryebashkiakja Zamira Rami, e cila është e zgjedhur e LSI-së. Po kështu s’kishte asnjë përfaqësues tjetër vendorë të LSI-së.

Nga Bashkia Gjirokastër i pranishëm ishte vetëm nënkryetari, Ylli Muho, i cili është në këtë post si përfaqësues i PS-së.

Vera Veizi kunata e Ziverit, pyet me dhimbje se si është e mundur që një vrasje e bërë në sy të të gjithëve përpara kamerave ku çdokush pa se nga u qëllua, sot ende të mos ketë një fajtor. Ajo tha ndër të tjera se reforma në drejtësi duhet së pari të merret me këto vrasje.