Oferta e çuditshme e lokalit ne Beograd: Ulje çmimesh për çdo gol që pëson Shqipëria

Një lokal në Beograd ka bërë një ofertë mjaft interesante për serbët. Ky lokal ofron 5 pëqrind zbritje për çdo gol që do të pësojë Shqipëria në ‘Euro 2016’

Kombëtarja serbe nuk do të marrë pjesë në Euro 2016 që starton të premten e ardhshme, por kjo nuk do të thotë që serbët nuk janë të interesuar se çfarë do të ndodhë nga data 10 qershor deri më 10 korrik në Francë.

Sidomos vëmendje të veçantë do të ketë në datat 11, 15 dhe 19 qershor kur do të luajë ndeshjet kombëtarja që i la jashtë kësaj gare, Shqipëria.

Një lokal në Beograd ka bërë një ofertë mjaft interesante duke i ftuar tifozët që ndeshjet e Shqipërisë t’i shohin bashkë.

Lokali ofron 5% zbritje për çdo gol që do të pësojë Shqipëria dhe Kroacia, ndërsa vodka falas për të gjithë në rast se Europianin do ta fitojë Rusia, shkruan TCH.

Por, duke ditur që Shqipëria e Gianni De Biasit nuk ka pësuar ndonjëherë më shumë se dy gola për ndeshje, tifozët serbë nuk pritet të përfitojnë shumë nga oferta e lokalit, por të paktën do të kenë kënaqësinë të shohin Shqipërinë në Europian.