Të krishterët e Libohovës pa një kishë

 Të krishterët e Libohovës pa një kishë

Orthodox_Church--dome&Cross“Çupreli” dhe “Kalistaja” kanë qenë historikisht dy prej dymbëdhjet lagjeve të Libohovës, ku banonin qytetarë të besimit të krishterë ortodoksë. Edhe sot ka të tillë, pavarësisht se një pjesë e tyre jetojnë në emigracion. Ndërsa vite më parë Libohova kishte 3 kisha në territorin e saj, sot nuk gëzon asnjë të tillë. Sigurisht që ky është një problem për besimtarët, të cilët shpesh shkojnë në kishat e Dropullit apo Gjirokastrës sa herë janë Krishtlindjet, Pashkët apo të tjera ngjarje të shënuara në kalendarin e tyre fetar.

Përveç kësaj, tashmë që Libohova e ka një xhami funksionale dhe disa mekame, mungesa e kishës sikur bie më shumë në sy. Jo për xhelozi apo karshillëk ndaj myslimanëve, por ndërtimi i një kishe funksionale në Libohovë do ta kompletonte qytetin nga pikëpamja e objekteve të kultit që i shërbejnë besimtarëve. Përveç kësaj, ekzistenca e një kishe do t’i jepte Libohovës fizionominë që sot kanë pothuajse të gjithë qytetet e Shqipërisë, ku krahas xhamive janë edhe kishat apo krahas kishave janë edhe xhamitë. Pikërisht prezenca e këtyre objekteve të kultit flet më së pari për atë vlerë që ne krenohemi sot nëpër botë, bashkëjetesën fetare.

Nga ana tjetër, rindërtimi i këtyre kishave duhet parë jo vetëm si një investim shpirtëror, por edhe historik. Investim mbi objekte që janë pjesë e historisë së Libohovës dhe memories kolektive të qytetarëve që kanë jetuar e jetojnë në këtë zonë. Në tre kishat historike të Libohovës; kisha e Shën e Premtes, kisha e Stojanit dhe Kisha e Shën Kollit, sot zor se gjen edhe gjurmë të tyre. Ndërkohë që në Kishën e Re të ndërtuar mbi kalanë e qytetit, godina është po ajo e ndërtuar në vitin 1938, por që pas marrëzisë komuniste të vitit 1967 është përshtatur në shtëpi banimi, ku sot e kësaj dite jetojnë dy familje.

Kush duhet ta ndërtojë kishën e re të Libohovës? Së pari, vetë besimtarët duhet të vihen në lëvizje, të organizohen, të formalizojnë kërkesën e tyre dhe ta paraqesin pranë Kishës Ortodokse Autoqefale të Shqipërisë. Pse jo të ndihmuar edhe nëpërmjet pushtetit lokal, i cili mund të lehtësojë proçedurat për ndërtimin e këtij objekti, njësoj siç bëri edhe me xhaminë e ngritur rishtaz. Në kushtet kur ka mjaft probleme të tjera që s’po i jepet zgjidhje, ndoshta është luks i madh të kërkosh që projekti të financohet nga qeveria apo bashkia. Ndaj, sytë duhen drejtuar prej institucioneve të Kishës Ortodokse Autoqefale të Shqipërisë. Libohova duhet të ketë një kishë funksionale.

Libohova Online